Haziri: Futsalli ka nevojë për mbështetje më të madhe

Drejtori i ekipit të futsallit Jetoni nga Gjilani, në një bisedë me TopSporti.com ka bërë të ditur se futbollistët e ekipit të tij po stërviten individualisht, derisa po presin tejkalimin e situatës aktuale për shkak të pandemisë.

Sa i përket problemeve finanaciare në klub, Jeton Haziri drejtor i ekipit ka bërë të ditur se pasi që janë skuadër e Ligës së Parë, nuk ka probleme me paga të lojtarëve, pasi që të gjithë pagohen sipas ndeshjeve të zhvilluara.

Sa i përket dueleve të mbetura të stinorit Haziri është shprehur:

“Derisa të krijohen kushtet e duhura duhet pritur, pasi që shëndeti është mbi të gjitha. Ndërsa kampionati nuk duhet ndërprerë, por të vazhdojë aty ku ka mbetur.”

Ai ka qenë edhe falenderues për FFK-në, që përmes një pakoje emergjente ka ndihmuar skuadrat e futsallit.

“Ka qenë një mbështjetje shumë e mirë nga ana e FFK-së në këtë kohë të vështirë për të gjithë ne,” ka thënë Haziri për TopSporti.com.

E sa i përket synimeve të klubit - aty nuk ka mëdyshje Haziri.

“Si çdo klub tjetër, edhe pse sapo jemi formuar synim e kemi të arrijmë Superligën,” ka bërë të ditur ai.

Skuadra Jetoni Futsall deri tash nga gjashtë ndeshje të zhvilluara ka arritur të tubojë 7 pikë duke shënuar dy fitore dhe një barazim në Ligën e Parë Grupi A, ku lider është Liqeni me 16 pikë.

Ndërsa si drejtor i një klubi futsalli Haziri po kërkon nga FFK-ja që t’i mbështes sa më shumë që është e mundur ekipet e futsallit.

Në anën tjetër, ai gjithashtu ka shtuar që tash është koha që të gjithë të qëndrojmë në shtëpi, të ruajmë shëndetin.

“Shpresoj ta kalojmë shpejtë këtë pandemi,” ka përfunduar bisedën Haziri.