Hysaj zëvendësues, Napoli arrin çerekfinalen

Napoli ka kaluar pa shumë telashe në çerekfinale të Kupës së Italisë sonte, pasi që mposhti Spezian në shtëpi me rezultat bindës, 3-1.

Në fakt, Napoli u këndell në pjesë të dytë të ndeshjes, pasi që rivali nga Serie B i bëri ballë në pjesë të parë të ndeshjes, 1-1.

Emanuele Giaccherini dhe Manolo Gabbiandini shënuan në pjesë të dytë për t’ia dhënë fitoren napolitanëve.

Mbrojtësi shqiptar, Elseid Hysaj, luajti si zëvendësues në këtë ndeshje, kur u fut në minutën e 78-të të ndeshjes nga trajneri Maurizio Sarri, për të zëvendësuar kroatin Ivan Strinic.

Në çerekfinale të Kupës së Italisë, Napoli do të luajë me fituesin e ndeshjes së nesërme (11 janar 2017) Fiorentina - Chievo.

Kjo ndeshje çerekfinale është paraparë të zhvillohet më 24 janar 2017 në ora 20e45.