Kosova mbetet pa fitore!

Në ndeshjen e fundit të fazës parakualifikuese drejt EuroBasket 2021, Kosova u mposht me rezultat 75-79 nga përfaqësuesja e Rumanisë, përfaqësuese kjo që ndodhet rreth 30 pozita para Kosovës në renditjen e përgjithshme të shteteve në FIBA. Ndeshja u zhvillua në një ambient mjaft të mirë sportiv, me ‘Pallatin e Rinisë dhe të Sporteve’ që ishte i mbushur me basketbolldashës.

Kosova zhvilloi një çerek të parë fantastik, në të cilin aplikoi mbrojtje mjaft të mirë dhe tregoi efikasitet të kënaqshëm në sulm, për ta mbyllur 10-minutëshin e parë me 7 pikë epërsi, 21-14.

Mirëpo, rënia e Kosovës filloi që nga çereku i dytë. Me një numër të madh të gabimeve personale dhe me efikasitet tejet të dobët (rreth 42%) nga gjuajtjet, si të lira e ashtu edhe nga loja, Kosova tregoi rënie të dukshme në lojë në këtë çerek. Në anën tjetër, mbrojtja e rumunëve në 10-minutëshin e dytë ishte më e mirë dhe në këtë mënyrë ata arritën që në pushim mes pjesëve të shkojnë me epërsi 38-39.

EUROBASKET 2021 - GRUPET PARAKUALIFIKUESE

E në çerekun e tretë, të ndikuar edhe nga ngritja e lojës së Lis Shoshit, Kosova ‘u lirua’ nga nervoza e çerekut të dytë dhe luajti dukshëm më mirë, për të shkuar në 10-minutëshin e fundit me epërsi 5 pikëshe, 61-56.

Fatkeqsisht, epërsia e çerekut të tretë nuk u ruajt deri në fund të takimit, pasi që ishte skuadra rumune ajo që u tregua më e përqëndruar në momentet vendimtare të duelit. Disa gjuajtje të njëpasnjëshme të sakta për tri pikë të rumunëve bënë që rezultati të kalonte në favorin e tyre, e në anën tjetër Kosova u ndikua edhe nga përjashtimi i Dardan Berishës, lojtarit më të dalluar të skuadrës, i cili u përjashtua nga loja kur kishin mbetur edhe 7 minuta lojë për shkak që shkaktoi një faull teknik e një tjetër me qëllim, e kjo ndikoi që Kosova të jetë më pak efikase në fazën ofansive në minutat e mbetura të takimit.

Pas 40 minutave lojë në Prishtinë, rezultati shënonte 75-79 në të mirë të Rumanisë.

Dardan Berisha me 22 pikë dhe Erjon Kastrati me 20 ishin koshashënuesit më të mirë të Kosovës sonte, kurse te Rumania sonte u veçua Giordan Watson me 23 pikë.

Kështu, Kosova e përfundon Grupi B parakualifikues në vendin e fundit, pas Maqedonisë e Rumanisë, mirëpo për ta arritur fazën kualifikuese të Kampionatit Evropian Kosova do ta ketë edhe një mundësi në muajin gusht të këtij viti, ku përmes një lloj turneu të veçantë, përfaqësueseve iu mundësohet që ta kërkojnë një vend në fazën kualifikuese.

Në muajin gusht Kosova për kundërshtarë do t’i ketë Luksemburgun dhe Britaninë e Madhe, ndaj të cilëve duhet të jetë më e mirë në mënyrë që të jetë pjesë e fazës kryesore kualifikuese drejt Kampionatit Evropian.

Sa i përket statistikave, Kosova nën drejtimin e trajnerit Damir Mulaomerovic ende nuk di për fitore në takimet e saj zyrtare, ndërsa deri më tash përfaqësuesja jonë për fitore në takimet zyrtare di vetëm me trajnerin amerikan Brad Greenberg.