Liverpool shkëlqen për t’ia bërë debutimin “zi” Ranierit

Claudio Ranieri ka debutuar në bankë të Watfordit në Premier Ligë sot, por përballë ka pasur Liverpoolin më në formë që prej dimrit kur kishte marrë rrugë drejt titullit të parë të kampionit në Premiership.

Super Mohamed Salah është treguar i pandalshëm, ndërsa Roberto Firmino ka shënuar hat-trick në fitoren e thellë prej 0-5 në Vicarage Road [Mane 9, Firmino 37, 52, 90, Salah 54].

Sadio Mane është bërë afrikani i tretë në histori që ka shënuar 100 gola në elitën angleze të futbollit, ndërsa para tij janë vetëm bashkëlojtari Salah, që ka barazuar rekordin e Didier Drogbës, 104 gola.

Për brazilianin punëtor, Firmino, ky ka qenë hat-tricku i parë për ekipin që prej dhjetorit të vitit 2018. Ndërsa ekipi i Jurgen Kloppit do të mund të fitonte edhe më thellë, në lojën që e dominoi plotësisht karshi Watfordit të pa ide.