Pa katër lojtarë kryesor, Kosova mposht Athletes in Action

Basketbollistët e përfaqësueses së Kosovës kanë përfunduar fazën e dytë përgatitore në Itali, me fitore.

Kosova sot ka mposhtur ekipin Athletes in Action me rezultat 88-81. Fitorja e Kosovës ndaj këtij ekipi bëhet më e rëndësishme kur kihet parasysh se Arben Krasniqi ka pushuar Justin Doellman, Dardan Berisha, Jaren Sina dhe Scott Bamworthin.

Te Kosova, sot ka qenë më efikasi Leonard Mekaj që ka përfunduar takimin me 20 pikë të shënuara, për 20 minuta sa ishte në lojë.

Granit Rugova ka shënuar 18 pikë e 3 asistime në këtë fitore, ndërsa Drilon Hajrizi ka kontribuuar me 12 pikë, 5 kërcime e 4 asitime, e Yll Kaçaniku me 11 pikë, 2 asistime e 2 kërcime.

Me këtë ndeshje të sotme, Kosova ka përfunduar fazën përgatitore në Como të Italisë, me bilanc 4 fitore e 1 humbje nga 5 ndeshje sa i kishte planifikuar t’i zhvillojë aty.

Pasi që të kthehet në Prishtinë, reprezentacioni i Kosovës do të vazhdojë me stërvitje të rregullta, para udhëtimit drejt Qipros për miqësoret ndaj këtij vendi e Katarit, që janë të fundit në ciklin përgatitor, para kualifikimeve për Eurobasket 2017.

Kosova në kualifikime për Eurobasket 2017 do të ndeshet me Slloveninë, Bullgarinë dhe Ukrainën.

Statistikat ekipore

Statistikat individuale te Kosova