Pas vazhdimeve, Kosova mposht Maqedoninë

Përfaqësuesja U-16 e Kosovës sot ka triumfuar ndaj Maqedonisë pas vazhdimeve me rezultat (15:20,16:14,11:15,18:11,8:6) në kuadër të Kampionatit Evropian U-16, Divizioni B që është duke u zhvilluar në Sofje të Bullgarisë.

Prej fillimit të ndeshjes e deri në fund është zhvilluar një rivalitet i madh në parket ndërmjet këtyre dy skuadrave dhe këtë e dëshmon më së miri fakti se është dashur të luhen edhe pesë minuta shtesë në mënyrë që të përcaktohet fituesi i këtij dueli.

Kosova ndeshjen e radhës do ta luaj të shtunën me fillim nga ora 12:45, ndërsa kundërshtarin e radhës do ta mësoj gjatë pasdites.

Sa i përket lojtarëve, Dardan Kapiti, ka qenë maestral në këtë ndeshje. Ai ka shënuar 26 pikë, 17 kërcime, 3 asistime dhe 1 bllokadë në fitoren e rëndësishme për Kosovën.

Përveç tij, pikë dyshifrore sot ka shënuar edhe Bleron Istogu që kontribuoi me 13 të shënuara.

Kosova U16 është duke luftuar për një vend që siguron pozitat 13 deri 16 në europian, pasi që nuk ka kaluar fazën grupore duke përfunduar e katërta nga gjashtë skuadra.

Kosova U16 në fakt nisi luftën për pozitën e nëntë, mirëpo u mposht nga Sllovakia dje dhe me këtë rast tash lufton për pozitat 13-16.