Qallaku vazhdon me Vëllaznimin

Basketbollisti pejan, Arian Qallaku, edhe këtë stinor do ta vesh fanellën e Vëllaznimit.

Ekipi gjakovar ka arritur marrëveshje për ta vazhduar bashkëpunimin me basketbollistin, i cili ishte koshashënuesi më i mirë i skuadrës në stinorin e kaluar duke luajtur me mesatare prej 17.1 pikëve për ndeshje.

Qallaku më parë ka luajtur për skuadrat si Peja, Besa dhe Ylli, ndërsa që nga fillimi i stinorit të kaluar, është pjesë e Vëllaznimit.

Ditë më parë, Vëllaznimi kishte arritur marrëveshje për vazhdim të kontratës edhe me basketbollistin tjetër pejan, Blendi Matoshin.