Rahoveci vazhdon përgatitjet në Suharekë

Në mungesë të palestrës adekuate për punë, KB Rahoveci, do të vazhdoj punën në Suharekë, ka bërë të ditur klubi që pritet të debutojë këtë stinor në Superligë të basketbollit.

“Pas tre javësh intensive të stërvitjeve në Rahovec, përkatësisht në sallën e Shkollës Profesionale “Selajdin Mullabazi – Mici”, basketbollistët e skuadrës sonë nga sot, do të zhvillojnë stërvitje nga dy herë në javë në palestrën e sporteve në Therandë, aty ky klubi ynë do t’i zhvillojë ndeshjet zyrtare në Superligë, në mungesë të infrastrukturës në qytetin tonë. Trajneri Jeton Nixha, e ka parë të domosdoshme që ekipi të  bëjë përgatitje edhe në Therandë, pasi basketbollistët duhet të ambientohen më vendin ku do t’i zhvillojnë ndeshjet zyrtare. Kjo fazë e përgatitjeve nga dy herë në javë në Therandë do të vazhdojë gjatë gjithë kohës deri në fillimin e edicionit të ri në Superligë me 1 tetor, shtuar këtu edhe stërvitjet e rregullta qe do te vazhdojnë në Rahovec gjate ditëve të tjera. Ndryshe duhet thënë se e tërë skuadra gjatë tre javëve të kaluara nën drejtimin e trajnerit Jeton Nixha dhe ndihmësit të tij Ibrahim Hoxha, ka zhvilluar stërvitje intensive, drejtë përgatitjeve për Superligë,” - ka shkruar njoftimi i klubit të Rahovecit sot në faqen zyrtare të saj.

Rahoveci ka angazhuar trajnerin e mirënjohur kosovar, Jeton Nixha, i cili po vazhdon punën me ekipin, që t’i bëj sa më të gatshëm lojtarët për Superligë.

Stinorin e kaluar, Rahoveci kishte përfunduar pa humbje stinorin e rregullt për të arritur në Play-Off të Ligës së Parë, ku në finale mposhti Dritën për t’i hapur dyert e Superligës.