Raste plot, por Shqipëria mposhtet nga kampionja e Evropës

Një miqësore e plotë do të mund të thuhej për përballjen e zhvilluar në Air Albania, ku edhe Shqipëria por edhe Italia shfaqën gjithçka për të kërkuar fitoren në duelin e luajtur në Tiranë sonte.

Italia, që erdhi në Tiranë si kampione aktuale e Evropës, por nuk arriti të sigurojë biletën për Kampionatin Botëror, dukej e urritur, njëjtë sikurse edhe kuqezinjtë, që kërkonin të tregoheshin ndaj azzurëve.

Shqipëria kapi epërsinë me një gol të Ardian Ismajlit, që shënoi me kokë, ndërsa shpejt italianët nga një ndërprerje pas 5 minutash barazuan. Ndërsa pas pesë minutëshit tjetër, ata shënuan edhe njëherë përmes Vincenzo Grifos për të dalë në epërsi, me rezultat 1-2 që ishte fund i pjesës së parë.

Në pjesë të dytë pas shtyllës së Nicolo Zaniolos, super mundësi kishte Myrto Uzuni (53’) që dridhi shtyllën e Alex Meretit, ndërsa pas tij ka qenë edhe Nedim Bajrami (59’) që tentoi - topi i të cilit gjithashtu u ndalë nga transversalja e Meretit.

Kur nuk shënon pëson, ndërsa Grifo në disponim sot, shënoi për përfundimtaren, pas një kombinimi të shpejtë nga krahu i djathtë italian, që gjeti atë të vetmuar në zonë, për të goditur menjëherë për fitore, Shqipëria 1-3 Italia [Ardian Ismajli 16 - Giovanni di Lorenzo 20, Vincenzo Grifo 25, 64].

Kështu djelmoshat e Roberto Mancinit dolën triumfues në Air Albania, edhe pse deri në fund kuqezinjtë humbën raste të mira, për tu përmendur ajo e Odise Roshit, kur do të duhej të qëllonte më mirë, ose të pasonte në mes të zonës për lojtarët e lirë që prisnin top!

Ndeshja u referua nga referi i Kosovës, Genc Nuza me ndihmësit Fatlum Berisha dhe Bujar Selimaj, ndërsa Shqipëria pas disfatës nga Katari në miqësoren e parë të këtij muaji, përjetoi edhe një humbje sonte. Këndellja pritet të ndodhë në përballjen e radhës, të cilën të përzgjedhurit e Edoardo Rejës e luajnë ndaj Armenisë, e cila barazoi me Kosovën sonte 2-2 në Fadil Vokrri.