Rifati i kthehet referimit

Njëri ndër referët më të dalluar të viteve të fundit në basketbollin kosovar, Arbnor Rifati, ka vendosur t’i rikthehet zanatit të tij. 

“Pas takimeve që kisha me disa anëtarë të FBK-së dhe Shoqatës së Gjyqtarëve, kam vendosur që t’i nënshtrohem testeve në fillim të janarit për t’iu kthyer referimit,” ka thënë Rifati në një prononcim për Borozani.com. 

Kështu, nëse i kalon testet ai do t’i kthehet punës së tij që e bëri të njohur në vend, pas 9 muajve. 

“Besoj që me përvojën time do të jap më të mirën për basketbollin dhe gjykimin në përgjithësi,” është shprehur më tej prizrenasi, i cili ka qenë ndër referët më të dalluar në basketbollin vendor ndër vite. 

Ai me disa kolegë të tij, pasi që nuk kishin arritur të kalonin testin fizik të mbajtur nga FBK, sipas kritereve të FIBA-së, kishin hequr dorë nga referimi i mëtutjeshëm për shkak se kishin kërkuar tolerancë për gjyqtarët me përvojë, por Federata nuk kishte menduar ashtu. 

Në disa raste, edhe basketbollistët e njohur të vendit në prononcime për media vendore, kishin thënë se mungesa e referëve me përvojë, ka ndikuar në baksetboll.

Rifati ka qenë ndër referët që ka referuar standard në finale të Play-Offit dhe Final Fourit të Kosovës.