Rikthimi i madh!

Pa shumë fjalë në postime, por me shumë video - KB Prishtina zyrtarizoi rikthimin e Dardan Berishës në ekip, pas periudhës tri-vjeçare të kaluar në KB Peja.

Basketbollisti më i mirë i Kosovës, Dardan Berisha, do të jetë përsëri pjesë e Prishtinës, që këtë stinor me trajnerin turk Ekrem Memnun mëton rikthimin e trofeve në kryeqytet, ndërsa do të marrë pjesë edhe në FIBA Europe Cup.

Bardhekaltërit deri tash kanë kryer punë me lojtarë vendorë, duke ruajtur bazën e stinorit të kaluar, ndërsa kanë shtuar edhe disa të tjerë si Valmir Kakruki dhe Rezart Memedi.

Ende asnjë lojtar i huaj nuk është zyrtarizuar te Plisat. Por, kjo pritet të ndodh në ditët në vijim, derisa Prishtina do të ketë punë në kualifikime për fazën grupore të FIBA Europe Cup.

“Ai është kthyer,” e shkruar në anglisht, ka qenë mjaftueshëm nga prishtinasit për të zyrtarizuar rikthimin e “Dalit” ndërsa videot me komentime të tresheve të tij dhe të Dardanit me mikrofon në dorë para publikut kanë folur mjaft.

Dardani sot është 33-vjeçar, ndërsa në nëntor do t’i mbush të 34-tat, mirëpo përvoja e tij dhe energjia, pritet të jetë shtytje e madhe për të gjithë të rinjtë vendorë që i ka në dispozicion Prishtina.

Lideri i reprezentacionit të Kosovës, përgjatë viteve të fundit të kaluara në Pejë fitoi Kupën e Kosovës dhe Ligën Unike. Ndërsa më parë ka fituar me Prishtinën titullin e kampionit tri herë, Ligën Ballkanike dhe Kupën e Kosovës.

Përkundër të gjithave, Dardani në stinorin e kaluar ka qenë mirë me formë, derisa ka shënuar 19.7 pikë mesatarisht me Pejën gjatë stinorit të rregullt në Superligë, për të shtuar edhe 5.4 asistime e 3.9 kërcime si mesatare.