VENDIMI I BORDIT
Së pari borxhet, pastaj nominimi për Pejën
27 July, 2015 @23:08
Në mbledhjen e mbajtur sot të Bordit të Federatës së Basketbollit të Kosovës, FBK, përveç tjerash, është konstatuar se ekipi i Pejës duhet të paguajë borxhet, para se të nominohet nga FBK për pjesëmarrje në BIBL.
“Kryetari i FBK-së, Erolld Belegu e njoftoi Bordin me zhvillimet e reja në raportet ndërmjet KB Peja dhe FBK-së, bisedat dhe kontaktet që janë zhvilluar me këtë klub ditëve të fundit. Bordi i FBK-së konstatoi që KB Peja nuk i ka përmbushur obligimet financiare ndaj FBK-së dhe ka vendosur që me tu përmbushur këto obligime, KB Peja do të nominohet për pjesëmarrje në Ligën Ballkanike (BIBL),” shkruan njoftimi i FBK-së i botuar sot në faqen zyrtare të saj.
Peja pritet që të bëhet ekipi i tretë pjesëmarrës këtë stinor në BIBL nga Kosova, pasi që më parë janë nominuar Bashkimi i Prizrenit dhe Sigal Prishtina.
Peja stinorin e shkuar ka arritur rekordin e klubit, gjysmëfinalen e BIBL-it.