Shtriks viziton Prizrenin, Bashkimi me një këmbë në BIBL

Klubi basketbollistik Bashkimi, sot ka pritur drejtorin sportiv të Ligës Ballkanike, Shay Shtriks, dhe menaxheren e marrëdhënieve ndërkombëtare, Lubomira Shtriks, të cilët kanë ardhur në qytetin e Prizrenit për t’i shikuar mundësitë e inkuadrimit të skuadrës së Bashkimit në Ligën Ballkanike.

Delegacioni i ardhur nga Liga Ballkanike, së bashku me kryetarin e klubit të Bashkimit, Shaqir Totaj dhe menaxherin Arlind Kaçaniku, gjithashtu ishin edhe mysafirë në Kuvendin Komunal, ku u takuan me kryetarin e komunës dhe kabinetin e tij qeveritar, me ç‘rast nga këta të fundit u konfirmua përkahja financiare për skuadrën e Bashkimit.

Ndërsa drejtori i Ligës Ballkanike, tha se me rastin e pranimit të skuadrës së Bashkimit në Ligën Ballkanike, që pritet të zyrtarizohet së shpejti, do të hapet një histori të re për basketbollin e qytetit.

“Kjo do të jetë një histori e re për basketbollin në këtë qytet, si dhe për sportin në përgjithësi. Unë ju premtoj se do të vi përsëri në Prizren për ta përcjellur ndeshjen e parë të Ligës Ballkanike këtu,” tha ndër tjerash Shtriks.

Më pas, drejtori sportiv i BIBL vizitoi edhe palestrën e sporteve “Sezai Surroi”, ku brenda kësaj jave pritet të fillojnë punimet për ta regulluar infrastrukturën në mënyrë që t’i përshtatet standardeve të kërkuara nga BIBL. 

Skuadra e Bashkimit kishte dërguar kërkesë zyrtare për t’u inkuadruar në Ligën Ballkanike, duke dashur të bëhet skuadra e tretë nga Kosova që do të merrë pjesë në këtë ligë pas Sigal Prishtinës dhe Pejës.

Edicioni i ri i Ligës Ballkanike do të fillojë më 13 tetor, derisa deri më tani pjesëmarrjen e kanë konfirmuar vetëm skuadrat Rilski, Kumanovo, Kozuv, Mornar, Sutjeska dhe Teodo.