YLLI - SIGAL PRISHTINA
Sigal Prishtina fiton dramën në Suharekë
7 April, 2018 @21:10
Sigal Prishtina, në ndeshjen kundër Yllit, që ishte e barabartë deri në sekondat e fundit, arriti ta mposht kundërshtarin me rezultat të ngushtë 84-86.
Ylli, çerekun e parë e përfundoi me 10 pikë epërsi (31-21), por Sigal Prishtina arriti të këndellet në çerekun e dytë, dhe e përfunduan pjesën e parë me dy pikë epërsi 50-48.
Pjesa e dytë e ndeshjes, ishte pothuajse e barabartë, epërsia kalonte herë te Ylli herë te Sigal Prishtina, por 56 sekonda para përfundimit të ndeshjes, Alban Veseli shënoi nga vija e treshit dhe Prishtina kaloi në epërsi.
Në sekondat e fundit, që të dyja skuadrat kishin raste për të shënuar por ishin të pa suksesshëm dhe ndeshja përfundoi në favor të kampiones aktuale.
Alban Veseli ishte koshashënuesi më i mirë te Prishtina me 24 pikë, derisa u ndihmua edhe nga Granit Rugova me 16 dhe Fisnik Rugova me 15 pikë e 11 kërcime të tjera.
Te Ylli u dalluan Alexis Wangmene me 24 pikë dhe Michael Harmon me 20 pikë të tjera, që nuk mjaftuan për fitore.
Kjo ishte fitorja e 25-të e Sigal Prishtinës në 26 xhiro të zhvilluara.
