Sllovenia sonte duelin e fundit, para Kosovës

Përfaqësuesja e Sllovenisë në basketboll, që është edhe rivalja më e fortë e Kosovës në grupin kualifikues për Eurobasket 2017, sonte zhvillon miqësoren e fundit para duelit ndaj vendit tonë.

Me fillim nga ora 20, Sllovenia ndeshet me Malin e Zi në “Stozice” të Ljubljanës.

Deri tani, Sllovenia ka mposhtur çerekun e Europës në përballje miqësore për tu përgatitur për ndeshje ndaj Kosovës.

“Mali i Zi do të jetë testi i vërtetë dhe i fundit për ne para ndeshjeve kualifikuese. Do jetë ndeshje e nivelit të lartë, ku asnjëra palë nuk do ta ketë fitoren e lehtë apo të sigurtë. Për mua me rëndësi është që të zhvillojmë ndeshje të mirë,” ka thënë trajneri slloven Igor Kokoskov, para duelit të sotëm.

Sllovenia deri më tani ka mposhtur Portugalinë, Belgjikën, Austrinë, Poloninë, Islandën, Britaninë e Madhe dhe Maqedoninë në miqësore, ndërsa nuk ka pësuar asnjë humbje.

Pas 4 ditësh, Sllovenia pret Kosovën në duelin e parë kualifikues për Eurobasket 2017. Ndërsa në anën tjetër, Mali i Zi është në një grup me Shqipërinë.