Spurs nxjerr fitoren në fund

San Antonio Spurs me performancë të mrekullueshme në çerekun e fundit të ndeshjes së parë finale të Play-Offit të NBA-së, ka arritur që të shënojë fitore ndaj kampionit në fuqi, Miami Heat. 

Ylli i Miami Heat, LeBron James, është dashur të lëshojë parketin për shkak të një lëndimi, në 5 minutëshin e fundit të çerekut të katërt të ndeshjes, të cilën ekipi i Teksasit e ka shfrytëzuar plotësisht. 

Rikthimi

Derisa James shikonte me dhimbje të dyfishtë, fizike dhe emocionale, se si kalonte Spurs përpara dhe u merrte lojën nga dora, Daniel Green  shënonte pikët vendimtare për San Antonion. 

James përfundoi ndeshjen me 25 pikë, 3 asistime dhe 6 kërcime, duke qenë më efikasi në ndeshje, derisa pas tij u dalluan edhe Dwyane Wade me 19 dhe Chris Bosh me 18 pikë të shënuara. 

Në anën tjetër te fituesit, qendra e kulturuar, Tim Duncan ka shënuar 21 pikë duke e përfunduar ndeshjen me double-double kur regjistroi edhe kërcimin e 10 të ndeshjes. Duncan ka qenë enigmë për Heatin, duke shënuar 9 prej 10 tentimeve nga zona. Ndihmë të madhe skuadrës së Spursit i ka dhënë argjentinasi Manu Ginobili që ka shutuar me saktësi 50% treshet. 

Shkrirja e epërsisë

E tërë epërsia e krijuar e Heat në ndeshje u shkri pas lëndimit të James, kur vetëm çerekun e fundit Spurs e fitoi me +19 diferencë - që ka çuar në përfundimtaren 110-95 dhe udhëheqjen 1-0 në seri, përkundër se dukej që Miami kishte lojën në dorë. 

“Ka qenë frustruese të shikosh ekipin duke u rrënuar dhe të mos mund t’i ndihmosh,” ka thënë James pas ndeshjes, duke paralajmëruar kthim për ndeshjen e dytë. 

“Mendoj se LeBron kërkoi disa herë të nxirrej nga loja, e ne e kuptuam se ai po lodhej. Lodheshim të gjithë... Por, një ndeshje të tillë nuk më kujtohet që kam luajtur ndonjëherë,” ka thënë Duncan pas fitores së ekipit të tij. 

Rruga e triumfit

Finalja e NBA-së luhet deri në katër fitore, derisa San Antonio Spurs do të jetë vendas edhe në ndeshjen e dytë (zhvillohet në mesnatën që ndan të dielën nga e hëna) para se seria të kalojë në Oqeanin Atlantik. 

Miami Heat kishte mposhtur San Antonio Spursin në finalen e stinorit të kaluar të NBA-së, derisa po e kërkon titullin e tretë me radhë këtë stinor. E Spurs, dëshiron që të fitojë titullin e parë që nga viti 2007.