Todorov: Synojmë paraqitje të mirë ndaj një kundërshtari me buxhet dukshëm më të madh

Peja nesër do të takohet me skuadrën rumune, Cluj, në kuadër të FIBA Europe Cup.

Kjo ndeshje do të jetë debutuese si për skuadrën verdhezi, ashtu edhe për trajnerin e skuadrës, Aleksandar Todorov.

Todorov e njeh mirë kundërshtarin e nesërm, pasi që më parë ka drejtuar skuadra nga Rumania, ndërsa në deklaratën e tij para ndeshjes, ka thënë se skuadrat kanë dallim të madh në aspektin buxhetor.

“Kjo do të jetë një ndeshje debutuese si për mua ashtu edhe për Pejën në FIBA Europe Cup. Kundërshtari ynë i parë, ekipi i Cluj-it përveç cilësisë ka edhe buxhet dukshëm më të madh se ne dhe këtë e tregon më së miri fakti se lojtari më i mirë rumun paguhet gjysmë milioni euro për tri vjet. Por ky fakt ne nuk na bënë të dorëzohemi, por duam që në këtë ligë të përfaqësohemi sa më mirë të jetë e mundur, duke filluar nga ballafaqimi i nesërm me Cluj-in,” tha Todorov për faqen zyrtare të FBK-së.