TOP 5-shja e gjysmëstinorit në Ligën e Parë 19/20

Pas 9 botimeve të pesëshes së javës në kuadër të Ligës së Parë, TopSporti ka përzgjedhur edhe pesëshen më të mirë të pjesës së parë të stinorit në Ligën e Parë, bazuar në pesëshet e javës.

Kështu, me 6 paraqitje në 5-shen e javës, Xavier Newson nga Vëllaznimi është basketbollisti që është zgjedhur më së shumti në më të mirët e javës, derisa luajti njërin ndër rolet kryesore te skuadra gjakovare, që ta mbyll gjysmëstinorin pa humbje.

Në suksesin e Vëllaznimit luajti rol edhe Arion Balluku. Fundori prizrenas në 9 xhirot e luajtuar 4 herë arriti të hyjë në TOP 5-shjen e javës.

Drita nuk e nisi mirë stinorin, duke regjistruar dy humbje radhazi, por në këndelljen e skuadrës gjilanase më meritori ishte Qëndrim Demi. Demi arriti të hyjë në pesëshen më të mirë të javës pesë herë gjatë gjysmëstinorit.

Pesë herë në pesëshen e javës gjeti vend edhe qendra e AS Prishtinës, Dion Haxhosaj. Haxhosaj në shumicën e ndeshjeve luajti me double-double për skuadrën prishtinase, derisa skuadra e tij e mbylli gjysmëstinorin në pozitën e dytë.

Më i miri te Istogu në vjeshtë ishte Diamant Shabani. Lojtari i njoftur me nofkën “Skafka”, katër herë është zgjedhur në pesëshen e javës, derisa ishte më i miri i skuadrës në këto 9 ndeshjet e zhvilluara.

Kështu, pesëshja e gjysmëstinorit në Ligën e Parë është kjo: Arion Balluku (Vëllaznimi), Qëndrim Demi (Drita), Xavier Newson (Vëllaznimi), Diamant Shabani (Istogu) dhe Dion Haxhosaj (AS Prishtina).