COACH OF THE HALF SEASON
Trajneri më i mirë i gjysmëstinorit në Ligën e Femrave
18 December, 2019 @17:04
Ka përfunduar stinori vjeshtor në Ligën e Femrave.
Topsporti ka zgjedhur trajnerin më të mirë të gjysmëstinorit në Ligën e Femrave.
Trajneri turk i Bashkimit, Furkan Saglik, është zgjedhur trajneri më i mirë i stinorit vjeshtor në Ligën e Femrave.
Furkan Saglik ka folur për faqen zyrtare të FBK-së, derisa trajneri i Bashkimit është duke kërkuar të fitoj çdo trofe sivjet.
“Kemi bërë një ekip mjaft cilësor, duke u përforcuar me Khadija-n (Haywood), Aisha-n (Balarabe), Saranda Dacin dhe Arbnore Përqukun, derisa kemi mbajtur edhe lojtaret kryesore të edicionit të kaluar. Kur kemi filluar stërvitjet në verë, kam parë një angazhim të madh të vashave dhe e kam kuptuar se mund të arrijmë diçka.
Sigurisht do të dëshiroja të vazhdoja pa humbje dhe të fitojmë çdo trofe, por ne duhet të punojmë për të arritur suksese,” ka thënë trajneri turk.
Saglik e nisi stinorin duke e fituar Superkupën e Femrave, derisa e përfundoi gjysmëstinorin pa humbje me bilanc prej 10 fitoreve.