Real i frikshëm, e nënta me radhë dhe thellon krizën e Milanit

Real Madridi ka vazhduar me fitore në Euroligë, duke e shënuar të 11-tën e stinorit dhe duke mbajtur hapin me liderin Anadolu Efes, derisa në anën tjetër Milan tashmë është në serinë më negative të stinorit.

Olimpia Milan pësoi humbjen e pestë radhazi në Euroligë dhe duket se djelmoshat e Ettore Messinas nuk e kanë ndërmend të këndellen.

Në fakt, pjesa e parë krejtësisht i takoi mysafirëve. Milan fitoi dy çerekët e parë për të shkuar në pushim me 9 pikë epërsi, 30-39.

Por në pjesën e dytë furia madrielene me më të mirin në fushë sonte Facundo Campazzo riktheu gjithçka dhe ekipi i Pablo Lasos u gëzua në fund me fitoren 76-67.

Campazzo shënoi 7 pikë e 12 asistime në fitore, ndërsa Anthony Randolph kontribuoi me 16 pikë e 7 kërcime për los blancosët. Në fund të ndeshjes i jashtëzakonshëm është treguar Jordan Mickey, që kreu ndeshjen me 15 pikë, ndërsa 13 i shënoi në çerekun e fundit!

Me fitore Reali tash ka bilanc 11-3, ndërsa Milan që s’po mund ta ndalë serinë negative prej tash 5 ndeshjeve pa fitore, ka bilans 7-7.