Vëllaznimi fiton dramën në Gjakovë

Ndeshja hapëse e xhiros së dytë në Ligën e Parë të Kosovës në basketboll, në mes të Vëllaznimit dhe Vushtrrisë, përfundoi me fitoren e skuadrës gjakovare vetëm pas vazhimeve.

Vëllaznimi e mposhti Vushtrrinë me rezultat 73-64.

Skuadra kuqezi ishte në shumicën e kohës në epërsi, ishin afër të festonin fitoren, por shënimi i Mendrit Ademit nga vija e treshit, bëri që të vonohet festimi për pesë minuta më vonë.

E në vazhdime Vëllaznimi u tregua më i kujdesshëm, duke e mposhtur kundërshtarin për ta regjistruar fitoren e dytë të stinorit.

Përforcimi i ri i skuadrës gjakovare, Xavier Newson, ishte më i miri me 34 pikë e 11 kërcime, derisa u ndihmua edhe nga Arion Balluku me 25 pikë, 8 asistime e 6 kërcime. Këta dy ishin të vetmit me pikë dyshifrore.

Te Vushtrria u dalluan Erhan Sholla me 25 pikë dhe Mendrit Ademi me 18 pikë të tjera.

TABELA AKTUALE

Pas 2 ndeshjeve të zhvilluara, Vëllaznimi ka 2 fitore, kurse Vushtrria 2 humbje.

Në xhiron tjetër, Vëllaznimi do të takohet me Borean, ndërsa Vushtrria me Prishtinën e Re.