PAS RËNIES
Pamje nga arkivi/ KFArberia/fb
Arbëria: U kemi borxh…
23 May, 2021 @18:43
Në stinorin debutues në Superligë të Kosovës, nuk mbijetuan. Skuadra simpatike e Arbëria që vjen nga Dobraja e Lipjanit ka humbur epitetin elit në futbollin kosovar pas disfatës ndaj ish-kampiones sot, Dritës.
Me këtë humbje dhe me rezultatet tjera të arritura të ditës, ekipi i drejtuar nga Arbnor Morina, ka rënë nga liga.
Derisa pas ndeshjes askush nuk ka folur nga klubi për media, faqja zyrtare e ekipit në Facebook ka lëshuar njoftimin, ku thotë mbaron gjithçka.
“Mbaron gjithçka. Përfundon aventura jonë në Superligë. Falemnderit të gjithëve për mbështetjen, falemnderit lojtarëve që dhanë gjithçka. Nuk ia dolëm dot! Kjo Arbëri humbi betejën por jo edhe luftën. Do të kthehemi prapë, ua kemi borxh gjithë atyre që me zemër e duan këtë stemë. Falemnderit!” ka shkruar njoftimi i ekipit kuqezi.
11 fitore e 7 barazime, karshi 18 humbjeve i sollën Arbërisë 40 pikë në Superligë, 2 më pak sesa Trepça’89, që me fitoren e sotme ndaj Drenicës kaloi mbi ta dhe do të kërkojë mbijetesën përmes barazhit në Superligë.
