Argjentina në gj’finale pas dramës ndaj Holandës

Argjentina ka arritur të sigurojë gjysmëfinalet e Kampionatit Botëror të Katarit, në një dramë të tejzgjatur, derisa lufta holandeze u ndalë vetëm pas penalltive, të cilat i mbrojti portieri Emi Martinez.

Gauchosët që udhëhiqnin 2-0 10-minuta para fundit të ndeshjes rrezikuan gjithçka, derisa zëvendësuesi Wout Weghorst shënoi dy herë për të çuar ndeshjen në vazhdime, kur shënoi dy herë para se të përfundonte koha e rregullt e takimit, që u zgjat për 10-minuta.

Në vazhdime gola nuk kishte. Ndërsa në penallti, Argjentina doli më e suksesshme falë Emi Martinezit që mbrojti dy penallti të holandezëve.

Briliancë e Messit në minutën e 35 të ndeshjes kur gjen Nahuel Molinën për t’i dhënë Argjetinës avantazhin, ndërsa gjithçka mendohej se përfundoi kur një penallti e shënuar maestralisht nga Leo Messi në minutën e 73 të ndeshjes bëri rezultatin 0-2 për Argjentinën.

Por, këtu ndërhyri gjeniu holandez që s’ka humbur ndeshje Botërori në kohë të rregullt e as në vazhdime, Louis Van Gaal. Në minutën e 78 të ndeshjes ai futi në lojë Wout Weghorstin në vend të Memphis Depayit të pa dëgjuar në ndeshje.

E ky, bëri atë për të cilën e kishte futur Van Gaal në ndeshje! Shënoi për të ulur epërsinë e argjentinasve në minutën e 83 të ndeshjes, ndërsa krejt në fund, kur referi kishte dhënë edhe 10 minuta shtesë, Holanda bëri një dinakëri në gjuajtje të lirë për të shënuar përsëri Weghorst - për të ngjallë dramën dhe për të çuar ndeshjen në vazhdime.

Aty, ndeshja shkoi pa shumë raste deri në 5 minutat e fundit të vazhdimit të dytë. Argjentina shpërdoroi tre raste të mira, njëra prej të cilave në shtyllë gjatë 5 minutave të fundit të kohës shtesë. Por, ishte e vendosur që 120 minutat të përfundojnë pa fitues dhe gjithçka të vendoset në ekzekutim të penalltive.

E aty doli në skenë brilianca e Emi Martinezit (që kishte bërë të njëjtën edhe në Copa America) derisa portieri mbrojti dy penalltitë e para të Holandës (Virgil Van Dijk, Steven Berghuis). Drama vazhdoi tutje kur Enzo Fernandez gjuajti jashtë penalltinë e tretë të Argjentinës, pasi që Leo Messi dhe Leandro Paredes kishin shënuar.

Teun Koopmeiners, Wout Weghorst dhe Luuk de Jong shënuan për 3-3 me penallti dhe bara ra mbi Lautaro Martinezin në penalltinë e dhjetë të të dyja palëve për të vendosur. Lautaro shënoi për të çuar në delir Argjentinën që në gjysmëfinale do të ndeshet me Kroacinë - ku do të kërkohet bileta për finale të Kupës së Botës, Katari 2022. Në fund Holanda 2 (3) - 2 (4) Argjentina.