Parada argjentinase, lojtarët “ikin” me helikopter

Lojtarët e ekipit fitues të Kupës së Botës është dashur të dalin nga parada e tyre me autobus në Buenos Aires përmes helikopterit, për shkak të miliona tifozëve që festonin në rrugët e kryeqytetit argjentinas.

Fillimisht, ekipi ishte menduar që të bëj paradë disa orëshe, por festimet e tifozëve në rrugët e stërmbushura që u panë me dhjetëra fotografi në internet, bënë që rrugët të jenë kaotike dhe u rimendua kthimi i lojtarëve në kamp!

“Ka qenë e pamundur të vazhdohet festa nëpër rrugë për shkak të eksplodimit të gëzimit,” kishte lëshuar cicërimën zëdhënësja Gabriela Cerruti, bën të ditur BBC Sport.

Videot nëpër rrjete sociale treguan mjaft, derisa u panë edhe tifozë duke kërcyer nga ura në autobus të lojtarëve të Argjentinës, njëri prej të cilëve edhe ra në tokë, duke mos mundur të kapej për autobus!

Rreziku u bë i pallogaritshëm, andaj u vendos që lojtarët të kthehen me helikopter!

Sipas përllogaritjeve të mediave lokale, në Buenos Aires ishin mbledhur nëpër rrugë rreth 4 milionë njerëz! Plaza de la Republica ishte ngjyrosur me ngjyrat e fanellave bardhë e kaltër-qiellore, derisa pritnin ekipin të vinte.

E tërë Argjentina ka qenë në festë që prej të dielës, kur penalltitë dramatike i nxorrën ata fitues karshi Francës në Botërorin e Katarit, në njërën që u pa si finalet më të mira të historisë së Botërorëve.

Për Argjentinën kjo ka qenë Kupa e parë e Botës që prej vitit 1986, ndërsa realizimi i ëndrrës së Lionel Messit (35-vj.) me La Albicelestet bëri festën edhe më të madhe gjithandej globit.