KERASAN PRISHTINA - AS PRISHTINA
AS Prishtina njofton me humbje Kerasan Prishtinën
8 November, 2019 @21:48
Dy shkuadrat nga Prishtina, të pamposhtura deri më tani, AS-i dhe Kerasani, u përballën në xhiron e katërt në kuadër të Ligës së Parë të Kosovës në basketboll.
Epiteti i të pamposhturit mbeti te ekipi i AS Prishtinës, i cili e mposhti Kerasan Prishtinën me rezultat 68-93.
Skuadra e trajnerit Valentin Spaqi, në çerekun e parë e krijoi një epërsi prej 23 pikëve, derisa distancën e mbajti deri në fund për ta vazhduar serinë e fitoreve.
Kreshnik Muçolli ishte koshashënuesi më i mirë te AS Prishtina me 24 pikë, derisa shkëlqeu edhe Dion Haxhosaj me 21 pikë e 20 kërcime kundër ish-ekipit të tij.
Te Kerasani si zakonisht më i miri ishte Endrit Berisha. Ai luajti me 24 pikë, 9 kërcime e 4 asistime.
Në Ligën e Parë të Kosovës në basketboll, tani vetëm AS Prishtina dhe Vëllaznimi janë pa humbje, derisa këto dy skuadra në xhiron tjetër do të përballen për ta ruajtur këtë epitet, kurse Kerasan Prishtina do të luaj kundër Istogut.