Bajrami refuzon Zvicrën për t’iu bashkuar Shqipërisë

Mesfushori i talentuar me origjinë shqiptare, Nedim Bajrami, ka pranuar të jetë pjesë e kombëtares shqiptare.

20-vjeçari i skuadrës italiane, Empoli, ka refuzuar ftesën e përfaqësueses U21 të Zvicrës për ta veshur fanellën kuqezi.

Lajmin e ka konfirmuar përzgjedhësi i Zvicrës U21, Mauro Lustrinelli, i cili ka folur për mediet zvicerane.

“Jemi munduar shumë për ta bindur atë që të vazhdojë të luajë për Zvicrën. Por ai më pas na tregoi se zemra e tij rreh më shumë për Shqipërinë. Nuk kishim zgjidhje tjetër përvecse ta lejojmë atë të shkojë”, ka thënë Lustrinelli.

Bajrami ka kaluar në të gjitha grupmoshat e përfaqësueses së Zvicrës, ndërsa së fundi me U21 ka pasur 12 paraqitje dhe 1 gol. Ai ka qenë njëri ndër shtyllet kryesore e ekipit helvetik që arriti të kualifikohej në kampionatin europian për U21.

Futbollisti me prejardhje nga Tetova pritet të grumbullohet me Shqipërinë qysh për ndeshjet e këtij muaji ku kuqezinjtë do të luajnë përballë Andorrës, Anglisë dhe San Marinos.

Në përfaqësuesen U21 të Zvicrës luajnë edhe futbollistë të tjerë me prejardhje shqiptare si Bastien Toma, Toni Domgjoni, Andi Zeqiri, Kastriot Imeri dhe Amir Shaipi, të cilët pritet të marrin vendimin përfundimtar për të ardhmen e tyre pas kampionatit europian për U21 që zhvillohet në qershor të këtij viti.