Ballkani shton distancën në krye

Pa shumë telashe, me një pjesë të parë të fuqishme, Ballkani ka mposhtur Malishevën sot në hapje të xhiros së XV të Superligës për të fituar duelin 0-2 dhe për të mbajtur distancën në krye të renditjes ndaj ndjekësve.

Aktualisht, Ballkani ka 10 pikë më shumë se Drita, në vend të dytë! Kjo është fitorja e pestë me radhë e kampionit të Kosovës në Superligë dhe e para pas kthimit të ndeshjeve me klube dhe pushimit që kishin për shkak të ndeshjeve të kombëtareve.

Nazmi Gripshi (30’) i dha avantazhin Ballkanit, pas asistimit të Walid Hamidit, ndërsa Albin Berisha kreu dilemat e fituesit në fund të pjesës së parë (42’) kur pas daljes jo të mirë të portierit Flamur Gashi shënoi lehtë për 0-2. Ky edhe ishte rezultati përfundimtar i ndeshjes: Malisheva 0-2 Ballkani [Nazmi Gripshi 30’, Albin Berisha 45’].

TABELA AKTUALE E SUPERLIGËS

Malisheva kështu u ndalë pas katër xhirosh pa humbje! Ekipi i drejtuar nga Qëndrim Kida bile as nuk kishte pësuar gol në këto duele. Por, sot, kampioni tregoi fuqinë dhe dallimin e madh me skuadrat tjera që e ka. 

Me këtë fitore, Ballkani pas 13 ndeshjeve të luajtura në 15 xhirot e para ka 35 pikë dhe është në krye të renditjes tabelare të Superligës. Malisheva në anën tjetër ka 15 ndeshje të luajtura dhe është e katërta me 20 pikë.