PËRFAQËSUESJA - KONFERENCA
Belegu kërkon përkrahje, së shpejti edhe fanellat
1 August, 2016 @19:43
Në konferencën për shtyp 1 muaj para ndeshjes së parë kualifikuese për Eurobasket 2017, Federata e Basketbollit të Kosovës e bëri prezantimin e parë para opinionit. Përveç disa lojtarëve dhe kryetrajnerit Arben Krasniqi, para mediave foli edhe kryetari i FBK-së, Erolld Belgu.
“I falënderoj të gjithë të pranishmit që kanë gjetur kohë ta ndjekin këtë aktivitet të rëndësishëm të federatës. Po ashtu dua të falënderoj edhe një herë të gjithë ata që po na përkrahin në përgatitjet për kualifikimet për Eurobasket 2017, duke filluar nga mediat, sponsorët dhe nga institucionet tona. Po ashtu dua të falënderoj edhe shtabin teknik të Kombëtares, drejtorin dhe basketbollistët për mundin dhe angazhimin që e kanë treguar për t’u përgatitur sa më mirë për kualifikimet për Kampionatin Evropian.
Do të jetë një ditë e shënuar pjesëmarrja jonë në këto kualifikime. Ne e kemi bërë të qartë se nuk do të jemi vetëm pjesëmarrës, por ambiciet tona janë reale, pra do të luftojmë deri në fund. Së bashku me të gjithë ata që po na përkrahin ne do të shkojmë drejt suksesit, e suksesi ynë është të luajmë sa më mirë, e pse jo edhe të besojmë edhe më shumë. Grupi është shumë i fortë, por ne do të përgatitemi për të bërë më të mirën.
I ftoj të gjithë njerëzit kudo në Kosovë, por edhe jashtë që të na përkrahin. Ne po punojmë shumë, por në të njëjtën kohë kemi nevojë për përkrahje edhe më të madhe institucionale. Kur them kështu i referohem asaj se ne ende nuk e dimë se ku do t’i zhvillojmë ndeshjet si vendas, pasi punimet në palestër nuk e dimë a do të përfundojnë me kohë. Ditë më parë ne e kemi nënshkruar një marrëveshje me agjencionin ‘Base’ që është shumë fitimprurëse për FBK-në, por në rast se ndeshjet si vendas do të detyrohemi t’i luajmë jashtë Kosovës, atëherë kjo marrëveshje do të rrezikohet. Megjithatë ne po shpresojmë se gjithçka do të përfundoj me kohë dhe se adhuruesit e basketbollit kosovar do të kenë rastin të kënaqen me basketboll cilësor në ndeshjet që do t’i luajmë në Prishtinë.
Fanellat e Kombëtares do të dalin në shitje deri në fund të javës dhe kjo është një tjetër mënyrë që përkrahësit tanë të na ndihmojnë me blerjen e tyre”. - deklaroi Belegu para mediave.