Besa në Komision Disiplinor, rrezikon rënien nga Superliga

Skuadra e Besës ka hyrë në telashe të mëdha. Derisa skuadra pejane pret të zhvillojë të enjtën (nesër) ndeshjen e dytë të Play Outit ndaj Newbornit për të siguruar mbijetesën në Superligë, ajo mund të pësojë në tavolinë, pasi që komesari i garave ka propozuar procedurë disiplinore ndaj saj.

Sipas komesarit, janë katër raste të shkeljeve të rregulloreve të klubit të Besës, kryesisht duke mos i kryer obligimet financiare ndaj FBK-së.

Obligimet financiare për regjistrimin e lojtarit të huaj Ball Gordon, lojtarit vendor Dorjan Zuberi, gjobat për gabimin teknik të Beq Kovaçit (dy herë) dhe Denis Kullashit, si dhe gjoba për mosjellje të DVD-së së ndeshjet, sipas komesarit janë konstatuar të falsifikuara.

Ky konstatim ka ardhur pasi në llogarinë e FBK-së nuk është deponuar shuma e përgjithshme që duhet të ishte 1380 euro.

“Në raste kur ky dënim i shqiptohet kryerësit të kundërvajtjes i cili mban dënimin e mëhershëm mund t`i shqiptohet dënim unik në kohëzgjatje më shumë se 3 vjet, e më së shumti 4 vjet. Në rast se kryerësi pas dënimit të dytë kryen kundërvajtje të re, mund t’i shqiptohet dënimi i ndalesës së përjetshme për loje ose kryerje të detyrës, kurse për KB Besa, për shkak të falsifikimit të dokumentacionit dhe inkuadrimit të lojtarëve pa të drejtë loje, sipas dëshmive të falsifikuara, të ndërmirren masa konform nenit 77 paragrafi 2 të Rregullores disiplinore,” thuhet në njoftimin e komesarit.

Nëse konstatohet se një lojtar i skuadrës së Besës është regjistruar me shënime të rrejshme ose dokumente të falsifikuara, atëherë ekipit pejan automatikisht do të shlyhen të gjitha rezultatet e arritura dhe do të përjashtohet nga Superliga.