BIBL konfirmon bisedimet me Pejën

Faqja zyrtare e ligës ballkanike, BIBL, ka bërë të ditur se drejtori sportiv i kësaj lige, Shay Shtriks, ka pasur bisedime me kryetarin e klubit të KB Peja, Art Gashi, dhe tashmë është gjithçka gati për pranimin e ekipit verdhezi në këtë ligë.

“Pranimi i KB Peja në Superligën e Kosovës ka hapur dyert për tu rikthyer edhe në arenën ndërkombëtare. Pas kësaj, Peja është pajtuar me BIBL që t’i rikthehet ligës pas dy viteve mungesë,” ka shkruar në njoftimin e botuar në faqen zyrtare të kësaj lige.

Peja në ndërkohë është duke konsoliduar ekipin për stinorin e ri në Superligë dhe ka emëruar trajner, ish-trajnerin e Bashkimit, Jeronimo Sarin.

Ekipi ka afruar disa basketbollistë të huaj në ekip, ndërsa nga forcat vendore spikat me kthimin e Drilon Hajrizit dhe Beqë Kovaqit.