Bryant kaloi Jordanin

Ylli i Los Angeles Lakers, Kobe Bryant, ka arritur që në ndeshjen e mbrëmshme të kalojë legjendën Michael Jordan në listën e koshashënuesve më të mirë në histori të NBA-së, duke dalë në vendin e tretë. 

Nga gjuajtjet e lira, ai shënoi dy herë, në momentin kur barazoi Jordanin me 32 mijë e 292 pikë të shënuara dhe me tjetrën e kaloi. 

Urimi i MJ

Të gjithë basketbollistët e pranishëm në parket ia uruan arritjen fenomenale 36 vjeçarit, derisa zyrtarisht u ndërpre ndeshja për t’ia dhënë atij topin e ndeshjes si kujtim për arritjen. 

“Uroj Kobe-in për arritjen e tij,” ka thënë fillimisht Michael Jordan për Associeated Press. “Ai është lojtar i madh, me etikë të fuqishme pune dhe ka pasion të madh për këtë lojë. Jam kënaqur duke e shikuar zhvillimin e lojës së tij ndër vite dhe jam duke pritur të shoh edhe arritje tjera nga ai.” 

I treti në listë

Arritjen e tij Bryant e realizoi në minutën e 5:24 të çerekut të dytë. Ai nuk ka thyer rekord, por vetëm ka kaluar Jordanin. Tashmë para tij janë vetëm Kareem Abdul Jabbar dhe Karl Malone.

Në fund të ndeshjes, Los Angeles Lakers mposhti Minnesota Timberwolvesin 100-94, e Kobe Bryant shënoi 26 pikë në fitore. Te vendasit u dallua rezervisti  Shabazz Muhammad, që shënoi numrin më të madh të pikëve në ndeshje, të cilin ekipi i tij e humbi, 28.

Me këtë fitore Lakers ka bilanc 8-16, derisa Timberwolves 5-18.