Buduçnost me triumf historik në ABA ligë

Skuadra nga Podgorica, Buduçnost, për herë të parë në histori të klubit dhe të ABA Ligës ka fituar titullin kampion të kësaj lige.

Ekipi në fjalë ka triumfuar në ndeshjen e katërt të serisë finale, 77-73 ndaj Crvena Zvezdës së Beogradit, për të festuar çmendur në fund.

Ekipi podgoricas, ku luan edhe kosovari i natyralizuar, Justin Doellman, ka bërë dallimin e kryesor në ndeshje gjatë pjesës së dytë, duke e marrë epërsinë 5-6 pikëshe, për të kontrolluar ndeshjen e vështirë në çerekun e fundit me 17-16 dhe për të fituar me katër pikë dallim në fund.

Nemanja Gordic ka qenë më efikasi te Buduçnost me 18 pikë të shënuara, 5 asistime e 2 topa të rrëmbyer, ndërsa Doellman ka kontribuuar për 5 minuta në këtë përballje duke regjistruar dy kërcime në mbrojtje dhe një top të rrëmbyer.

Lojtari i ndeshjes është shpallë Nikola Ivanovic, që ka shënuar 17 pikë, 3 kërcime në këtë fitore.

Stinorin që vjen, Buduçnost do të jetë pjesë e Euroligës.