DRITA
Drita do të befasojë!
14 November, 2012 @22:00
Basketbollisti amerikan që erdhi në Gjilan, Laurence Donelson, është i uritur për basketboll. Ai nuk e shikon ku luan, me rëndësi është që të luajë basketboll.
Alo-qendra 208 centimetërshe e Dritës, Donelson, kështu u përgjigj në pyetjen për nivelin e basketbollit këtu.
“Në Kosovë luhet basketboll, kështu e shoh unë. Nuk ka lidhje çfarë ekipi dhe çfarë lige, basketbolli është basketboll dhe kjo është me rëndësi. Të luhet basketboll,” është shprehur Donelson.
Ish lojtari i Sacrametno Heat Wave dhe Chicago Rage në ABA ligën e basketbollit amerikan e sheh si sfidë të radhës Dritën.
Vështirësi në komunikim
“Komunikimi me ekipin është faktor shumë i rëndësishëm në ekip, kur kemi të bëjmë me kiminë e skuadrës për t’i bashkuar të gjitha komponentet. Pasi që unë nuk di shqip, e Drita ka një ekip shumë të ri dhe ata nuk mund të flasin si duhet anglisht – kjo paraqet vështirësi. Mirëpo në përgjithësi, Drita ka një ekip shumë të ri, të talentuar dhe janë lojtarë të mirë, kjo është më e rëndësishmja,” ka shtuar ai.
Fitorja ndaj Kosovës së Vushtrrisë ka mbetur fitorja e vetme e Dritës pas fazës së parë të garave në BKT Superligë. Çka pritet nga Drita në ndeshjet e ardhshme të stinorit?
Do të befasojmë
“Unë jam adaptuar shumë mirë te ekipi im dhe situata aty. Drita do të jetë befasia e kësaj lige, këtë mund ta them,” ka thënë ndër të tjera Donelson ne bisedë me Borozani.com.
Donelson përndryshe është parë edhe në stadiumin e futbollit të Gjilanit, duke i përcjellë ndeshjet e Dritës në futboll, ndërsa bashkë me Devin Chambersin tani kanë lehtësuar punën e Dritës në BKT Superligë. Pasi që disa nga lojtarët më të mirë të Dritës si talenti Arian Mehmeti dhe Driton Sylejmani janë liruar nga barra shumë e madhe që e mbanin deri më tani.
Drita ka arritur të mposht Kosovën e Vushtrrisë, që është fitorja e vetme deri më tani e gjilanasve, krahas ndeshjeve të tjera që janë të humbura. Në xhiron e radhës Drita takohet me Bashkimin në Prizren. Ndoshta edhe Drita do të mund të befasojë Bashkimin sikurse RTV 21-shi!!!