Ferizaji mbyll përgatitjet me bilanc pozitiv

Ferizaji ka kryer sot fazën përgatitore jashtë vendit. Ekipi pas ndeshjes së luajtur ndaj Tikvesit është kthyer për në shtëpi, pas dy javëve qëndrim në zonën e Dojranit të Maqedonisë Veriore.

Ekipi është duke kërkuar mbijetesën në Superligë këtë stinor, ndërsa ka mbyllur vjeshtën në pozitën e fundit të renditjes tabelare me 13 pikë nga 18 ndeshje të luajtura.

Sa i përket fazës përgatitore, futbollistët nën urdhërat e Andrej Panadicit kanë arritur të shënojnë tre fitore dhe të regjistrojnë dy humbje në pesë ndeshjet miqësore-kontrolluese aty.

Në përballjet me ekipet e elitës së futbollit maqedonas Ferizaji ka mposhtur Pobedën 1-0, ndërsa është mposhtur nga Tikvesi 1-0. Ndërsa në duele me ekipet e kategorisë së dytë të Maqedonisë Veriore, Ferizaji ka mposhtur Belasicën 2-0, Teteksin 1-0, kurse është mposhtur nga Detoniti 1-0.

Garat në futbollin kosovar, për pjesën pranverore të stinorit, vazhdojnë pas dy javësh. Ndërsa ekipi ka bërë të ditur se deri sa të nisin ndeshjet e pjesës së dytë të stinorit do të vazhdojë me përgatitjet finale në Kosovë.

Ndeshjet miqësore dhe rezultatet e arritura:

Ferizaji 1-0 Pobeda [Drilon Islami]
Ferizaji 0-1 Detonit
Belasica 0-2 Ferizaji [Albin Krasniqi, Mateo Panadic]
Ferizaji 1-0 Teteks [Dardan Qerkini]
Tikves 1-0 Ferizaji.