FRANCA - KROACIA
Franca s’fal në sulm, merr titullin e Botës
15 July, 2018 @19:05
Francezët duruan dhe në fund fituan. Përkundër lojës të mirë 60min të Kroacisë, Franca shënoi dy herë përmes gabimeve të Kroacisë dhe mbylli pjesën e parë 2-1 (Mandzukic AG, Griezmann PEN. - Perisic).
Edhe në pjesë të dytë, sikurse në të parën, Kroacia nisi më mirë. Por, me golin e shënuar nga Paul Pogba për 3-1, Franca u këndell dhe fitoi titullin e Botës.
Kylian Mbappe më pas (65’) vulosi gjithçka 4-1, me një goditje precize pas depërtimit të Lucas Hernandezit.
Kroacia vazhdoi me ngulm drejt sulmit. Mandzukic shfrytëzoi gabimin amatoresk të Hugo Llorisit për 4-2, ndërsa ‘vatreni’ vazhduan të dominojnë me lojë, përkundër se ishin me dy gola në disavantazh.
Në fund, Franca festoi titullin e dytë të Botës, pas 20 vjetëve, në finalen me më së shumti gola të shënuara ndonjëherë, që prej asaj të 1958.
