Francë e fuqishme, Holanda rrezikon Botërorin

Me futboll të bukur dhe lojë shembullore, përfaqësuesja e Francës arriti ta fitojë takimin e luajtur ndaj Holandës në Paris, për t’ia komplikuar kësaj të fundit edhe më tepër punët për kualifikim në Botëror, me Suedinë e Bullgarinë që qëndrojnë para tulipanëve në renditjen e grupit.

Goli i epërsisë për francezët u shënua nga Antoine Griezmann, kurse fitorja u vulos nga dy golat e Thomas Lemarit në pjesën e dytë. Kur ndeshja veç ishte e mbyllur, për 4-0 u përkujdes Kylian Mbappe, lojtari i cili para pak orëve kaloi zyrtarisht te PSG-ja, e më pas gola tjerë nuk pati.

Duhet përmendur që Holanda ishte me 10 lojtarë në fushë për afro 30 minuta, me mesfushori Strootman që u përjashtua pas dy kartonëve të verdhë.

GRUPET RUSIA 2018

Me Francën që duket se do të jetë bindshëm lidere e grupit, Holanda për t’i rikthyer gjasat duhet ta fitojë fillimisht takimin e ardhshëm që e luan ndaj Bullgarisë, e më pas të vazhdojë me rezultate pozitive edhe në takimet tjera, përndryshe mbetet jashtë Botërorit të Rusisë.