Harden i jashtëzakonshëm, shuan kampionin në vazhdime

James Harden shënoi tre pikësh kur kishin mbetur 2.7 sekonda për të përfunduar vazhdimet e ndeshjes.

Me këtë, ai përfundoi me triple-double-in e dytë këtë javë dhe ndeshjen e pestë radhazi me 40+ pikë të shënuara.

Krejt kjo, për t’ia dhënë ekipit të tij Houston Rockets, fitoren e madhe ndaj kampionit Golden State Warriors 135-134 në trillerin e Konferencës Perëndimore.

TABELA AKTUALE

Shuti i fundit i ndeshjes nga Kevin Durant, nuk u fut në kosh. Ndërsa Harden përfundoi duelin me 44 pikë, 15 asistime dhe 10 kërcime.

Steph Curry (35 pikë) i çoi Warriorsat në epërsi 23.1 sekonda para fundit të vazhdimeve, por Harden bëri që të përjetohet edhe një moment fantastik. Ai lëshoi topin nga dora, kur para fytyrës kishte së paku tre shuplaka dorësh që tentonin t’ia bllokonin shutin, për fitore.

Fitore e madhe e raketave ndaj luftëtarëve si mysafirë, ndërsa bilanci i fituesve është 22-15, e i humbësve të sotëm 25-14.