Kapiteni Gërbeshi nuk e nënçmon Hajvalinë

Kapiteni i kampionit aktual të Kosovës, Ferronikeli, Fidan Gërbeshi, para ndeshjes ndaj Hajvalisë ka thënë se ekipi do t’i qaset me seriozitet kësaj ndeshjeje, ndërsa ka bërë të ditur që me kthimin e lojtarëve standard të ekipit që kanë qenë të lënduar, Nikli do të jetë edhe më i fortë.

“Takimi me Hajvalinë ndoshta duket i lehtë në letër, por ne do t’i qasemi me shumë seriozitet. Kampionati është i gjatë dhe çdo ndeshje ka rëndësinë e vetë,” ka thënë ndër të tjera Gërbeshi në konferencën për shtyp para ndeshjes së nesërme që nis në ora 14:00 nesër.

Feronikeli ka kapur startin më të mirë të pranverës bashkë me lideren Trepça’89. Kampioni aktual i Kosovës ka shënuar 4 fitore nga 4 ndeshjet e para të stinorit.