Klopp s’mendon për titull ende

Trajneri i Liverpoolit, Jurgen Klopp, përkundër fitores së rëndësishme ndaj Manchester Cityt dje, ka thënë se nuk është duke menduar për titull kampioni. Së paku ende jo.

“Ne duhet të fitojmë ndeshjet tona dhe të shikojmë ku po na çojnë ato,” ka thënë Klopp kur u pyet pas ndeshjes për titullin.

“Kur do të jemi 5-6 xhiro para përfundimit të stinorit mund të mendojmë ndryshe, por tash për tash, duhet të mbledhim pikë dhe këtë jemi duke e bërë,” ka thënë Klopp.

Liverpool është aktualisht në pozitë të dytë në Premier Ligë me 6 pikë më pak se Chelsea lider. Këta të fundit janë në formë të jashtëzakonshme dhe kanë thyer rekordin e vet me 13 fitore radhazi në PremierLigë.

Liverpool nuk ka pësuar në 5 ndeshjet e fundit, ndërsa në katër të fundit ka shënuar 4 fitore. Nesër ata udhëtojnë për në duel ndaj Sunderlandit që është në krizë rezultatesh.