Kthehen Rama e Meha

Përzgjedhësi italian i kombëtares shqiptare, Gianni De Biasi, sot nëpërmjet një konference për media ka prezentuar listën e lojtarëve të ftuar për dy ndeshjet e radhës që do të luhen në kuadër të eliminatoreve të Kampionatit Europian.

“Do të përqëndrohemi tek ndeshja me Danimarkën dhe s’do të flasim për atë me Serbinë. Sigurisht, që është një ndeshje e vështirë, ndaj një kundërshtari  që sidomos në transfertë, është i gatshëm të të godasë. Luan shpejt dhe është shumë i përgatitur fizikisht. Ne jemi të ndërgjegjshëm për këtë. Do të na duhet shumë përqëndrim dhe luftë e fortë, për ti mbajtur ata sa më larg zonës tonë. Nuk ka ndeshje që të mos hyjmë për fitore, pavarësisht nga rrjedha e lojës,” ka thënë De Biasi gjatë konferencës, transmeton faqja zyrtare e FSHF-së.

Tekniku italian ka ftuar gjithsej 27 futbollistë, duke përfshirë edhe Valdet Ramën dhe Alban Mehën, të cilët nuk ishin ftuar në ndeshjen e kaluar kundër Portugalisë për shkaqe të ndryshme.

Emër i ri në kombëtaren tonë është portieri 26 vjeçar i Partizanit, Alban Hoxha, i cili me paraqitjet e mira në këtë stinor ka arritur ta bind De Biasin për ta rezervuar një ftesë edhe për të.

Kuqezinjtë më 11 tetor do të përballen me Danimarkën në Elbasan Arena, derisa tre ditë më pas do të udhëtojnë në Beograd për t’u ndeshur me Serbinë.

Lista e plotë e të ftuarve