Kupa të mbetet në Rahovec

Kapiteni i ri i Rahovecit, Bardh Rexha, bashkë me ekipin, është duke synuar trofeun e parë të madh për klubin.

Në prononcimin e tij dhënë për FBK-në para fillimit të Final 8 të Kupës së Kosovës ai ka thënë se ekipi është përgatitur maksimalisht për të mbajtur trofeun në qytetin e tyre.

“Jemi falënderues Federatës së Basketbollit të Kosovës që na është besuar sërish organizimi i Kupës në Rahovec. Ne jemi duke u përgatitur maksimalisht, pasi jemi edhe organizator dhe besoj se Kupa do të mbetet në Rahovec. Ne jemi përgatitur maksimalisht për garat e Kupës, një trofe shumë i rëndësishëm për ne,” ka thënë Rexha.

Rahoveci në Final 8 të Kupës do të përballet me skuadrën e Trepçës, që së fundi është këndellur me përforcime, ndërsa dueli mes tyre luhet nesër mbrëma, 11 shkurt, me fillim prej orës 19:00.

Fituesi kalon në gjysmëfinale të Kupës. Vitin e kaluar Rahoveci pat arritur për herë të parë në finale të Kupës, por atë e humbën nga Prishtina.