Maqedonia mposht edhe Rumaninë

Me nga 21 pikë të shënuara secili, Vojdan Stojanovksi dhe Bojan Trajkovski, si dhe 14 të tjera të shënuara nga amerikani Richard Hendrix, Maqedonia ka triumfuar ndaj Rumanisë 90-76.

Maqedonia që ditë më parë mposhti Kosovën në Prishtinë me 3 pikë dallim, sot ka kaluar lehtë ndaj Rumanisë, duke e fituar me 14 pikë dallim për të ruajtur bilancin perfekt në grupin parakualifikues për Eurobasket 2021.

Stojanovski ka përfunduar ndeshjen me 21 pikë, 13 kërcime e 5 asistime për të marrë epitetin e më të mirit në ndeshje, ndërsa lojën maqedonasit e fituan në çerek të dytë dhe të tretë, kur krijuan distancë të konsiderueshme në rezultat, që e ruajtën në çerek të fundit për të fituar.

TABELA AKTUALE E GRUPIT dhe ORARI I NDESHJEVE

Giordan Watson me 17 pikë, Nicolae Nicolescu me 16 dhe Emanuel Cate me 15 pikë e 8 kërcime kanë qenë më të mirët te Rumania e selektorit Tudor Costescu, që tashmë ka përjetuar humbjen e parë në grup 90-76 (20-19, 23-16, 24-17 dhe 23-24).

Ndeshja e radhës për Rumaninë është ndaj Kosovës, që luhet më 29 nëntor të këtij viti në Rumani. Pas kësaj ndeshjeje, Kosova do të udhëtojë në Shkup për ndeshjen e kthimit ndaj Maqedonisë.