Nottingham del nga fundi i tabelës!

Skuadra e Nottingham Forestit që iu kthye Premier Ligës pas 23 vitesh, ka dalë nga fundi i renditjes tabelare në elitën e futbollit anglez pas barazimit të sotëm ndaj Aston Villës, 1-1 [Dennis 15 - Young 22].

Emmanuel Dennis shënoi golin e parë te ekipi i tij i ri duke i dhënë epërsinë skuadrës, por shpejt Ashley Young nga largësia neutralizoi rezultatin!

Luftë të madhe bënë vendasit për pikën e fituar dhe konfirmimin e Steeve Cooperit si trajner, që zgjati kontratën dje me klubin pavarësisht rezultateve në Premier Ligë. E Dennis që erdhi nga Watford për 20 milionë funta gjatë verës, shënoi golin e parë për ekipin.

Në fund Aston Villa e Steven Gerrardit ishte e zhgënjyer, pasi që një gol i Ollie Watkinsit u anulua për ofsajd, ndërsa patën edhe një penallti të kërkuar!

Për Forestin është pika e parë e fituar në 5 ndeshjet e fundit në Premier Ligë, derisa Villa bën barazimin e dytë radhazi.