KB RAHOVECI
Pas EuropeCup, edhe në BIBL
25 July, 2019 @10:34
Një stinor me angazhime trefish më të mëdha se zakonisht po e pret Rahovecin.
Edicioni 2019/20 do të jetë debutues për Rahovecin në gara ndërkombëtare, ndërsa përveç FIBA Europe Cup, ku tashmë e dinë kundërshtarin dhe rrugën për tu kualifikuar, sot edhe zyrtarisht janë bërë pjesë e BIBL.
Përmes një njoftimi Liga Ballkanike e basketbollit ka bërë të ditur se pas Vllaznisë së Shkodrës, Rahoveci është ekipi i radhës që ka paraqitur kërkesën për regjistrim në garat e këtij sezoni.
Nënkampioni i Kosovës kështu pritet të sjellë ekipe të ndryshme në Mizahir Isma këtë stinor, derisa adhuruesit e ekipit do të kenë kënaqësinë të shohin ekipin e tyre në dy gara ndërkombëtare me kundërshtarë prej më të ndryshmëve.
Përndryshe, Rahoveci emëroi Neven Plantakun kryetrajner të skuadrës për këtë stinor dhe aktualisht nuk kanë bërë ndonjë përforcim shtesë përveç se kanë vazhduar me gjakovarin Atik Koshi, që është edhe pjesë e reprezentacionit të Kosovës.
