PEJA-TREPÇA
Peja ka zemër, fiton dramën në derbi
5 November, 2017 @17:53
3 minuta para fundit të ndeshjes, rezultati ishte i barabartë 61-61. Leonard Mekaj i dha epërsinë Pejës duke shënuar një nga 2 gjuajtjet e lira, 62-61. Më pas Arian Qallaku shënoi për 64-61, derisa në sulmin tjetër, Julian Hyden shënoi për 64-63.
Kishin mbetur edhe 2 minuta lojë në Karagaç në derbin e dy ekipeve të katërshes së madhe, që nuk janë në nivelin e pritur këtë stinor. Mirëpo, derbi mbeti derbi. Dramë deri në fund të ndeshjes, ndërsa Arti Hajdari rikthen Pejën në 3 pikë epërsi, 66-63.
SEKONDAT E FUNDIT
Vetëm 47 sekonda para fundit të ndeshjes, Burim Zekiqi i Trepçës gjuan për tre pikë dhe barazon gjithçka, 66-66.
Një top i kapur i Rron Grapcit në sulm, mundësoi që Qallaku të shënojë për rezultatin përfundimtar 68-66, derisa në 20 sekondat e fundit Trepça nuk arriti të shënojë nga tentimi i vetëm që kishte, për tre pikë.
Kjo ishte fitorja e katërt e Pejës këtë stinor, duke barazuar bilancin në 4-4 pas 8 ndeshjeve të zhvilluara. E sonte verdhezinjtë luajtën mirë në çerekët tek, derisa çereku i dytë dhe i katërti ishin plotësisht të mysafirëve, që dështuan në sekondat vendimtare për të fituar ndeshjen edhe pse kishin topin.
PERFORMANCAT INDIVIDUALE
Të gjitha pikët për Pejën u shënuan nga Arian Qallaku 24, Arti Hajdari 20 dhe Leonard Mekaj 20 e Beqë Kovaçi 4. Ekipi luajti me 6 lojtarë, derisa Rron Grapci shtoi 8 kërcime, prej të cilës njëra doli të jetë vendimtare për fitore, e Rron Ukaj 3 kërcime tjera.
Trepçës nuk i ndihmuan as 41 pikët e përbashkëta të dyshes amerikane, Mark Willams 20 dhe Julian Hyden 21 (+19 kërcime).
Kapiteni Valdrin Haxhiu luajti pa pushim për 40 minuta, shënoi 6 pikë, 8 kërcime, 4 asistime e 2 topa të vjedhura, por ekipi s’arriti fitoren.
Trepça mbetet e fundit në klasifikim me vetëm 1 fitore nga 8 ndeshjet e zhvilluara deri tash në Superligë, ndërsa në 3 xhirot e fundit është e përforcuar edhe me 2 amerikanët.