PEJA - BASHKIMI
Peja nis furishëm vitin, me 100+ të shënuara në derbi
13 January, 2022 @20:49
Skuadra e Pejës duke e mposhtur Bashkimin me rezultat 101-71 arriti një fitore të rëndësishme në derbin e xhiros 15 në Superligë dhe u ngrit në pozitën e dytë.
Epërsia ishte te Peja nga minuta e parë e deri në fund.
Djelmoshat e trajnerit Semsetin Bas, që në çerekun e parë arritën të krijojnë epërsi dyshifrore (27-10), derisa pjesa e parë u mbyll me rezultat 56-33.
Peja e thelloi epërsinë në çerekun e tretë 80-48, kurse në çerekun e fundit kontrolli ishte totalisht te skuadra pejane.
Arian Qallaku ishte koshashënuesi më i mirë te Peja me 20 pikë, derisa u dalluan edhe Stephen Maxwell me 18 pikë, Tyrone White me 16 pikë, Dardan Berisha me 13 pikë dhe Daniel Lekndreaj me double-double prej 11 pikëve e 10 kërcimeve.
Te Bashkimi u veçuan Valon Bunjaku me 17 pikë, Anton Kazarnovski me 12 pikë e 10 kërcime dhe Kendrick Thompson me 10 pikë.
Kjo ishte fitorja e dytë e Pejës kundër Bashkimit në 3 ndeshjet e zhvilluara, derisa me 10 fitore e 5 humbje ngritet në pozitën e dytë.
Në anën tjetër Bashkimi me 8 fitore e 7 humbje gjendet në pozitën e pestë.
