Prepelic: E patë që Kosova ishte e rrezikshme

Basketbollisti slloven, Klemen Prepelic, në deklaratën e tij pas ndeshjes u ka thënë mediave se u vërtetua që Kosova është një tjetër ekip në shtëpinë e vetë, para publikut të vetë.

“Sigurisht që shumica para televizioneve kanë thënë që ndeshja ndaj Kosovës do të jetë më e lehta për ne. Por, ne ishim pa dy lojtarët më të mirë, vëllezërit Dragic, që janë thuajse 50% e ekipit tonë. Kosova tregoi se është ekip tepër i mirë, ndërsa kanë njërin ndër alo-qendrat më të mirë në Europë, Justin Doellman, që ka qenë i pandalshëm dhe shënoi 30 pikë mbrëmë,” ka thënë ai.

“Sidoqoftë, për shkak të bankës së shkurtë të Kosovës, ne pritëm lodhjen e tyre, e në fund hyrja e Matic Rebecit na lehtësoi punën, pasi që ndali sulmet e Kosovës. Ky është një detaj i vogël në lojë, por i rëndësishëm për fitore,” ka thënë Prepelic 23 vjeç, që shënoi 27 pikë, 9 kërcime e 3 asistime në fitoren e mbrëmshme të Sllovenisë ndaj Kosovës.

Sllovenia pas kësaj ndeshjeje ka bilanc 4-0, ndërsa Kosova 0-4.