Prishtina e Peja me angazhime në FIBA Europe Cup

Për shkak të angazhimeve në FIBA Europe Cup, Prishtina e Peja nuk do të luajnë as në këtë xhiro të Ballkan Ligës. Dy skuadrat kosovare kanë zhvilluar vetëm nga 1 ndeshje në BIBL deri më tani nga 4 xhiro sa janë zhvilluar gjithsej dhe kjo për shkak të angazhimeve të vazhdueshme në mesjavë në kuadër të FIBA Europe Cup.

Kjo mesjavë do të jetë e fundit për Prishtinën e Pejën në këtë garë për sivjet, pasi që Sigal Prishtina është eliminuar ndërsa Peja ka gjasa minimale për të shkuar tutje.

Që nga mesjava e ardhshme, të dyja skuadrat do të fillojnë rikuperimin e ndeshjeve të mbetura në BIBL.

Sa i përket FIBA Europe Cup, Peja e pret nesër Gaziantepin në “Karagaç” me fillim nga ora 19:30, ndërsa Sigal Prishtina luan të mërkurën ndaj Eniseyt rus me fillim nga ora 18:30 në kryeqytet.