‘Prishtina meritoi fitoren’

Trajneri i mysafirëve nga Gjevgjelia, Milos Pejic, ka thënë se Prishtina e deshi më shumë fitoren sesa ekipi i tij mbrëmë. 

Kozuv u mposht thellë nga Prishtina, përkundër se gjatë stinorit të rregullt kishte mposhtur dy herë bardhekaltërit. 

“E uroj Prishtinën për fitoren e merituar. Ata ishin më të mirë dhe luajtën shumë mirë. Atmosfera ishte shumë e mirë gjithashtu. Ata kanë avantazh të madh para ndeshjes së kthimit, por ne do të bëjmë më të mirën për ta rikthyer atë. Së paku të fitojmë,” është cituar të ketë thënë Pejic për faqen zyrtare të ligës ballkanike, balkanleague.net. 

Kozuv cilësohet si njëri ndër ekipet më të forta të këtij stinori në BIBL, derisa gjatë pjesës më të madhe të stinorit të rregullt nuk kishin pësuar fare humbje. 

Ndeshja e kthimit luhet në Gjevgjeli, ku Kozuv pret Prishtinën. Prishtina ka epërsi 24 pikëshe para kësaj ndeshjeje dhe është shumë afër finales së parë të Balkan League.