Ramadani: Vetëm përforcime cilësore

Prishtina po vazhdon përgatitjet për kualifikime të Ligës së Kampionëve në Gjakovë, ndërsa trajneri Zekirija Ramadani ka dhënë një mesazh të qartë për prurjet në skuadër.

Duke folur për faqen zyrtare të vetë klubit prishtinas, trajneri shkupjan i ekipit kampion të Kosovës që do të debutojë në kualifikime për Champions ka bërë të ditur se me shumë kujdes do të përzgjedhin transferimet e mundshme te bardhekaltërit gjatë afatit kalimtar.

“Organika e ekipit ka ngelur. Janë liruar disa futbollistë që ndoshta nuk kanë qenë në përbërjen e parë. Mendoj se duhet të jemi tepër të kujdesshëm me prurjet e reja. Na duhet vetëm kualitet dhe jo numër. Ai futbollist që vjen te Prishtina duhet të ketë bagazh për të rritur konkurrencën. Konkurrenca e shëndoshë na sjell rezultate pozitive,” ka thënë Ramadani, duke bërë të ditur se Prishtina do të sjellë përforcime, por jo gjithëfare në skuadër.